Felismino Soriano Da Costa

NATON ONA HA’U MAK HALO Ó AREPENDE, Domin mak moris tinan rua nia laran wainhira ita sei tur iha banku sekundariu to’o ona ba nia rohan. Wainhira ha’u hili dalan husik ó, hodi tuir nia ne’ebé fo iis moris mai ita. Dalan mak ha’u lao ba hakotu dunik tali domin ita nian. Ó la fiar ho notísia nebe ó rona kona mai ha’u husi ita nia kolega. Tan ha’u rasik sedauk fó hatene ba ó ne’ebé hetan status nu’udar ha’u nia doben, katak ha’u sei tama seminariu. Masa, mane maka baruk teen ba misa. Mane maka sábadu kalan tama sai bairu hodi buka festa. Mane maka kakutak hanoin de’it feto. Bele tama seminariu? Hanoin maka mosu iha ó ulun kona mai ha’u, wainhira notísia kona-ba ha’u atu tama seminariu to’o ba ó tilun husi ó nia kolega mak ami hela ladun dook malu.